ដាក់បណ្ដឹងទៅក្រសួងមហាផ្ទៃរួច ថ្ងៃនេះ លី ណូរ៉ា ចេញមុខបង្ហាញគណនីហ្វេសប៊ុកក្លែងក្លាយបីទៀត

តារាសម្ដែងប្រុស លី ណូរ៉ា អះអាងថាមានគណនីហ្វេសប៊ុកជាច្រើនបានប្រើរូបថតលោក និងខ្លះបានបង្កើតគណនីដូចឈ្មោះលោក ដើម្បីឆបោកលុយគេ និងប្រព្រឹត្ដិបទល្មើសផ្សេងៗ។ គិតត្រឹមថ្ងៃទី១ ខែមិថុនា ឆ្នាំ២០២៣ នេះ នៅមានគណនីហ្វេសប៊ុកចំនួនបីទៀត នៅបន្ដប្រើរូបថតលោក ហើយលោកបារម្ភខ្លាចមានបញ្ហាទៅថ្ងៃក្រោយទៀត ទើបលោកប្រកាសឲ្យមហាជនជួយដឹងឮរឿងនេះ។

តារាប្រុសរូបនេះ និយាយថា បច្ចុប្បន្នលោកមានគណនីហ្វេសប៊ុកពិតប្រាកដ ឬផ្លូវការតែពីរប៉ុណ្ណោះ គឺ Ly Nora និង Ly Nora ll ។ ដោយឡែកគណនីហ្វេសប៊ុកឈ្មោះ Bong Ra ឈ្មោះ Pich Sambath និងឈ្មោះ Rithy Kun ដែលយករូបថតលោកទៅប្រើនោះ មិនមែនជាគណនីរបស់លោកឡើយ ហើយកន្លងទៅគណនីទាំងនេះ បានប្រើប្រាស់ដើម្បីបោកលុយគេ និងទង្វើអាក្រក់ផ្សេងៗ។

លី ណូរ៉ា បញ្ជាក់ថា រូបលោកបានដាក់ពាក្យបណ្ដឹងទៅអាជ្ញាធរមានសមត្ថកិច្ច នៃនាយកដ្ឋានប្រឆាំងបទល្មើសបច្ចេកវិទ្យា ក្រសួងមហាផ្ទៃរួចហើយ បន្ទាប់ពីរូបលោកបានទទួលបានការសាកសួរបញ្ជាក់ពីមិត្ដភក្ដិ និងអ្នកគាំទ្រមួយចំនួនជុំវិញរឿងខ្ចីលុយ និងបទល្មើសឆបោកផ្សេងៗទាំងដែលលោកមិនដឹងអ្វីសោះ៕

ជិន សុភ័ក្ដ្រ