អភិបាលខេត្ត កំពង់ធំចុះត្រួតពិនិត្យស្ថានភាព ផ្លូវ១ខ្សែក្នុងក្រុងស្ទឹងសែន ដែលនឹងត្រូវស្ថាបនាជាផ្លូវបេតុង
(កំពង់ធំ)៖ឯកឧត្តម ងួន រតនៈ អភិបាលខេត្តកំពង់ធំចុះត្រួតពិនិត្យស្ថានភាពផ្លូវ១ខ្សែក្នុងក្រុងស្ទឹងសែន គ្រោងស្ថាបនា
ជាផ្លូវបេតុងក្នុងពេលឆាប់ៗខាងមុខនេះ ។
ឯកឧត្តម ងួន រតនៈ មានប្រសាសន៍ថាដោយមើលឃើញពីការលំបាកក្នុងការធ្វើដំណើររបស់ប្រជាពលរដ្ឋដោយសារតែកន្លងមកផ្លូវ១ខ្សែនេះមានទំហំតូចជាពិសេសពេលរដូវវស្សាមានភ្លៀងធ្លាក់បង្កអោយមានការលំបាកផ្លូវមានសភាព រអិលនិងមិនមានសុវត្ថិភាពក្នុងការចរាចរណ៍ឆ្លងកាត់ផង។
ឯកឧត្តមបន្តថាផ្លូវមួយខ្សែនេះនឹងក្លាយទៅជាសរសៃឈាមសេដ្ឋកិច្ចមួយដ៏សំខាន់នៅពេលដែលស្ថាបនារួចរាល់ ព្រោះនឹងជួយសម្រួលដល់ការធ្វើដំណើរចរាចរណ៍ទៅមកលើកកម្ពស់សេដ្ឋកិច្ចកាត់បន្ថយការកើតមានគ្រោះថ្នាក់ ធានាបាននៅសុវត្ថិភាពក្នុងការធ្វើដំណើរ ។
ឯកឧត្តម ងួន រតនៈ សូមសម្ដែងនូវភាពសប្បាយរីករាយអបអរសាទរដល់អាជ្ញាធរមូលដ្ឋាន និងប្រជាពលរដ្ឋក្នុងការទទួលបានផ្លូវបេតុងក្នុងពេលខាងមុខនេះ ។
គួរបញ្ជាក់ថាផ្លូវបេតុងនេះមានប្រវែង១,៦៤៥ ម៉ែត្រ ទទឹង៦ម៉ែត្រ កំរាស់១,៥ ម៉ែត្រចាប់ពីភូមិស្លាកែត សង្កាត់ព្រៃតាហ៊ូ និង ភូមិអាចារ្យលាក់ សង្កាត់អាចារ្យលាក់ ក្រុងស្ទឹងសែន ។